कोल्हापूर : काही व्यक्ती, काही जागा आपल्याला प्रथमदर्शनी क्लिक होत नाहीत; पण मग कालांतराने सहवासातून आपुलकी निर्माण होते आणि मग नकळत प्रेम! पहिल्या नजरेत होणाऱ्या प्रेमापेक्षा सहवासातून उमलत जाणारं प्रेम जास्त गहिरं आणि हळवं असतं. हे साधं सरळ इक्वेशन असतं; पण तरी ते भल्याभल्यांना लवकर उमगत नाही. आधी आपल्या अगदी समोर असलेल्या गोष्टी आता आपल्याला हव्याहव्याशा वाटू लागतात. प्रेमाची नवी परिभाषा दाखवणारा, स्वरूप रीक्रिएशन अँड मिडिया प्रा. लि. निर्मित आणि चंद्रकांत कणसे दिग्दर्शित ‘भेटली तू पुन्हा’ या चित्रपटाचे मोशन पोस्टर हेच जादुई इक्वेशन सोप्या पद्धतीने सोडवून दाखवत आहे.
बोलके शब्द आणि मुक्या भावना व्यक्त करणाऱ्या कवितेच्या ओळी, वैभव तत्त्ववादी आणि पूजा सावंत यांची जोडी, ‘डीडीएलजे’ची आठवण करून देणारा रोमँटिक असा ट्रेनचा प्रवास या सगळ्या कारणांमुळे या मोशन पोस्टरला प्रेक्षकांची विशेष पसंती मिळाली आहे. आतापर्यंत दोन लाखांहून अधिक प्रेक्षकांनी हे मोशन पोस्टर पाहिले आहे.
असा हा प्रेमाच्या पुन्हा पुन्हा प्रेमात पडणारा ‘भेटली तू पुन्हा’ हा चित्रपट येत्या २८ जुलै रोजी प्रदर्शित होणार आहे.